غربت ، بیروز گاری اور جہالت کے خاتمے کیلئے ملکر جدوجہد کرنا ہوگی ، شہباز شریف

26 فروری ، 2024

لاہور(خصوصی نمائندہ) مسلم لیگ (ن) کے صدر و نامزد وزیر اعظم شہبازشریف نے کہا ہے کہ غربت، بیروزگاری اور جہالت کے خاتمے کیلئے ملکرجدوجہدکرنا ہوگی، معاشی استحکام کیلئے تمام تر اختلافات بالائے طاق رکھتے ہوئے کاوشیں کرنا ہوں گی، معاشی استحکام کیلئے سیاسی استحکام نہایت ضروری ہے۔انہوں نے اپنے بیان میں کہا کہ باہمی اتحاد کی جتنی ضرورت آج ہے اس سے پہلے نہ تھی، ملک سے غربت، بے روزگاری اور جہالت کے خاتمے کیلئے مل کرجدوجہد کرنا ہوگی۔انہوں نے کہا کہ سادگی اور کفایت شعاری کو اپناتے ہوئے زیادہ سے زیادہ وسائل عوام کی فلاح و بہبود پرخرچ کرنا ہوں گے، بیرونی سرمایہ کاری کیلئے سیاسی استحکام اورپرامن فضا بیحد اہمیت کی حامل ہے۔پاکستان تبھی خوشحال ہوگا جب اس کی تمام اکائیاں خوشحال ہوں گی، تمام صوبوں کی ترقی میرے دل کے قریب ترین ہے۔شہباز شریف نے کہا کہ پہلے بھی معاشی ترقی،استحکام کی روشن مثال قائم کی، اب بھی معیشت کو بہتر بنانے کیلئےٹھوس اقدامات کیے جائیں گے، زندہ قومیں چیلنجزاورمشکلات کا سامنا جرئت اور محنت سے کرتی ہیں۔ متحد ہوکر آگے بڑھیں گے اور مسائل حل کریں گے، میاں نواز شریف کی قیادت میں ملک کوخوشحالی وترقی کی راہ پرگامزن کریں گے۔