8فروری کے بعد دھاندلی سے نشستیں چھینی جا رہی ہیں، علیمہ خان

راولپنڈی (این این آئی)بانی پی ٹی آئی کی ہمشیرہ علیمہ خان نے بانی پی ٹی آئی کا نیا پیغام میڈیا کو سنا تے ہوئے کہا ہے کہ فروری کے بعد اب تک دھاندلی کے ذریعے نشستیں چھینی جا رہی ہیں، ججز کو سمجھ آ گئی ہے کہ کیسے دھاندلی ہوئی، تمام فارم45منظرعام پر آ چکے ہیں، ان کے مطابق نتائج جاری کرنا ہوں گے۔اڈیالہ جیل کے باہر بانی پی ٹی آئی کی ہمشیرہ علیمہ خان نے میڈیا سے گفتگو کرتے ہوئے کہا کہ بانی پی ٹی آئی کاپیغام ہے کہ 9 فروری کو دھاندلی کی مثال نہیں ملتی، 8 فروری کے بعد اب تک دھاندلی کے ذریعے نشستیں چھینی جا رہی ہیں۔انہوں نے کہاکہ پی ٹی آئی کے لوگوں کو 2 سال سے پکڑا جا رہا ہے، سزائیں دی جا رہی ہیں، پی ٹی آئی کی خواتین کو بھی نہیں چھوڑا گیا، یہ ووٹ امیدواروں کا نہیں عوام کا ہے جو چھینا جا رہا ہے۔بانی پی ٹی آئی کی ہمشیرہ نے کہا کہ جو چوری کا ووٹ لے کر اسمبلی پہنچے وہ پریشان ہیں،قانونی طور پر اب تمام کارروائی سپریم کورٹ میں ہوگی۔علیمہ خان نے کہا ہے کہ عوام سارا مینڈیٹ عدالت کے ذریعے واپس لیں گے، ووٹ عوام کا ہے جس نے حفاظت کرنا تھی نہیں کی، ووٹ کی حفاظت نہیں کر سکتے تو سسٹم کو ردی کی ٹوکری میں پھینک دینا چاہیے۔انہوں نے کہا کہ مینڈیٹ چوری کے معاملے پر ہم ہائی کورٹ جا چکے ہیں، انتخابات سے متعلق سارا ڈیٹا انٹر نیٹ پر اپ لوڈ کر دیا ہے۔ علیمہ خان نے کہا کہ سپریم کورٹ اور ہائی کورٹ کے ججز کو سمجھ آ گئی ہے کہ کیسے دھاندلی ہوئی، تمام فارم 45 منظرِ عام پر آ چکے ہیں، ان کے مطابق نتائج جاری کرنا ہوں گے۔