صدر علوی کیخلاف آئین شکنی کےمقدمات ہونگے ، بلاول بھٹو ، کل اسمبلی اجلاس ضرور ہوگا ، اسحاق ڈار

لاہور ،اسلام آباد،راولپنڈی،(اپنے نامہ نگار سے،نیوز ایجنسیاں،مانیٹرنگ ڈیسک)پاکستان پیپلز پارٹی کے چیئرمین بلاول بھٹو زرداری نے کہا ہے کہ صدر عارف علوی پر آئین توڑنے کے دو مقدمات ہوں گے، ایک مقدمہ عدم اعتماد کے وقت اسمبلی توڑنے ، دوسرا آئین کے مطابق اسمبلی اجلاس نہ بلانے کا ہو گا،سیاستدان ایک دوسرے کی عزت نہیں کرینگے تو امید نہ رکھیں کہ کوئی ادارہ انکی عزت کریگا، جبکہ رہنما پاکستان مسلم لیگ (ن) اسحٰق ڈار نے کہا ہے کہ کل( 29 فروری کو) قومی اسمبلی کا اجلاس ضرور ہوگا،قومی اسمبلی اجلاس سے متعلق کنفیوژن پھیلائی جا رہی ہے، ایوان مکمل نہ ہونے کا مؤقف درست نہیں،صدر پھر آئین شکنی کرنا چاہتے ہیں ،ہم مل کر وزیراعظم، سپیکر اور ڈپٹی سپیکر منتخب کریں گے۔میڈیا سے گفتگو کرتے ہوئے بلاول بھٹو نے کہا کہ عارف علوی آئین کو توڑتے ہوئے اپنا فرض نہیں نبھا رہے، صدر آئینی ذمے داری پوری نہیں کرتے تو اسپیکر پوری کر دیں گے، صدارت صدر عارف علوی کے بس کی بات نہیں، مواخذے کے بجائے انتخابی عمل کے ذریعے عارف علوی کی جگہ دوسرا صدر لائیں گے، آئین میں لکھا ہے ہر حال میں 29 فروری کو اسمبلی کا اجلاس بلانا ہے۔چیئرمین پیپلز پارٹی نے کہا کہ آصف زرداری کی مفاہمت کے عمل میں پی ٹی آئی شامل ہوگی۔ تاریخ کو درست کرنے کے لیے پہلا قدم بھٹو ریفرنس کا فیصلہ ہو گا، ایسا مضبوط فیصلہ دیا جائے جس سے ایک فل اسٹاپ لگایا جاسکے، پیپلز پارٹی کا موقف ہے کہ ادارے آئین میں رہ کر کام کریں۔ بلاول بھٹو نے کہا کہ، ذوالفقار علی بھٹو کا ٹرائل نہیں عدالتی قتل ہوا تھا۔