بانیPTIاور بشریٰ بی بی پر 190ملین پائونڈ کیس میں فرد جرم عائد ، 6مارچ کو 5گواہ طلب

اسلام آباد (نمائندہ جنگ) احتساب عدالت نے 190 ملین پاونڈز کیس میں بانی پی ٹی آئی عمران خان اور انکی اہلیہ بشریٰ بی بی پر فرد جرم عائد کرتے ہوئے 6 مارچ کو 5گواہان طلب کر لئے،منگل کو سماعت کے دوران عمران خان روسٹرم پر آئے اور کہا کہ ہم کیس میں تاخیر نہیں چاہتے ، 8 فروری سے پہلے نیب کو جلدی تھی ، اب ہم چاہتے ہیں کہ ریفرنس کی سماعت جلد مکمل ہو،احتساب عدالت کے جج ناصر جاوید رانا نے بانی پی ٹی آئی سے سوال کیا کہ آپ پر چارج فریم کیا جا رہا ہے ، آپ بتائیں قصور وار ہیں یانہیں ؟ عمران خان نے کہا کہ میں نے چارج شیٹ پڑھ کر کیا کرنا ؟ مجھے معلوم ہے اس میں کیا لکھا ہے۔ فاضل جج نے فرد جرم پڑھ کر سنائی ، ملزمان نے صحت جرم سے انکار کر دیا ، قبل ازیں منگل کو احتساب عدالت کے جج ناصر جاوید رانا نے اڈیالہ جیل میں 190 ملین پاونڈز ریفرنس کی سماعت کی تو عمران خان اور بشریٰ بی بی کو عدالت میں پیش کیا گیا۔