پاکستان معاشی اصلاحات کیلئے آئی ایم ایف کیساتھ کام جاری رکھے، امریکا

واشنگٹن (واجد علی سید ) امریکا نے اسلام آباد پر زور دیا ہے کہ وہ ملک میں معاشی اصلاحات کو یقینی بنانے کے لئے آئی ایم ایف اور دیگر متعلقہ اداروں کے ساتھ مل کر کام جاری رکھے۔امریکی محکمہ خارجہ کے ترجمان میتھیو ملر نے بدھ کو کہا کہ "ہم قرضوں اور بین الاقوامی مالی امداد کے گھن چکر سے آزاد ہونے کے لئے پاکستان کی کوششوں کی حمایت کرتے ہیں۔" "پاکستان کی معیشت کی طویل المدتی صحت اس کے استحکام کے لئے اہم ہے۔" انہوں نے یہ بات روزانہ کی بریفنگ کے دوران ایک سوال کے جواب میں کہی۔ ترجمان نے اسی نکتے پر زور دیتے ہوئے یہ بھی کہا کہ "پاکستان کی نئی حکومت کو فوری طور پر معاشی صورتحال کو ترجیح دینی چاہیے کیونکہ آئندہ کئی ماہ کی پالیسیاں پاکستانیوں کے لئے معاشی استحکام کو برقرار رکھنے کے لئے انتہائی اہم ہوں گی۔" انہوں نے مزید کہا، "ہم پاکستان پر زور دیتے ہیں کہ وہ آئی ایم ایف اور دیگر بین الاقوامی مالیاتی اداروں کے ساتھ میکرو اکنامک ریفارمز کیلئے کام جاری رکھے۔"