وزیراعلیٰ مریم نواز اور آصفہ بھٹو مہمانوں کیلئے مخصوص سپیکر گیلری میں

اسلام آباد (فاروق اقدس) حلف برداری کے یادگار مناظر دیکھنے کیلئے سابق وزیراعظم میاں نواز شریف کی صاحبزادی اور پنجاب کی وزیراعلیٰ مریم نواز اور سابق صدر آصف علی زرداری کی صاحبزادی آصفہ بھٹو بھی ایوان میں خصوصی مہمانوں کیلئے مخصوص سپیکر گیلری میں موجود تھیں جنہوں نے دیگر مہمانوں کی توجہ حاصل کی ہوئی تھی۔مریم نواز نے شفقت سے آصفہ بھٹو کے سر پر ہاتھ پھیرا، معانقہ کیا، آئندہ رابطے اور ملاقات کی خواہش بھی ظاہر کی ، رکنیت کے رجسٹر پر دستخط کرنے کیلئے جب دونوں شخصیات میاں نواز شریف اور آصف زرداری کے نام پکارے گئے تو دونوں کی صاحبزادیوں نے فرط جذبات سے اپنی پارٹی کے حق میں بے ساختہ نعرے لگاتے ہوئے اپنی خوشی کا اظہار کیا۔ اجلاس کے اختتام پر رخصت ہونے سے پہلے وزیراعلیٰ مریم نواز نے آصف بھٹو کے سر پر شفقت سے ہاتھ پھیرا اور انہیں گلے سے لگایا اور مبارکباد دینے کے ساتھ ساتھ آئندہ رابطے اور ملاقات کی خواہش بھی ظاہر کی۔ اس موقعہ پر آصف علی زرداری کی خصوصی معاون رخسانہ بنگش اور سینیٹر اسحاق ڈار بھی موجود تھے۔