’’آ عندلیب مل کے کریں آہ و زاریاں ‘‘

02 مارچ ، 2024

اسلام آباد (فاروق اقدس ) ’’آ عندلیب مل کے کریں آہ و زاریاں ‘مصدقہ ذرائع سے معلوم ہوا ہے کہ مسلم لیگ (ن) کے قائد نواز شریف اور مولانا فضل الرحمان کے درمیان جمعہ کو وفود کی سطح پر ہونے والی ملاقات کے بعد دونوں راہنمائوں کی ’’ون آن ون‘‘ تفصیلی ملاقات بھی ہوئی۔ دونوں راہنمائوں کے درمیان ہونے والی ملاقات میں آئندہ کیلئے کسی حکمت عملی پر بات چیت ہوئی ہے یا پھر مولانا فضل الرحمان نے سابق وزیراعظم کو آئندہ کی منصوبہ بندی کے حوالے سے اعتماد میں لیا ہے اس بارے میں محض قیاس کے حوالے سے گفتگو کی جارہی ہے۔ تاہم ایک نہایت مصدقہ ذریعے کے مطابق مولانا فضل الرحمان نے وفود کی سطح پر ہونے والے مذاکرات میں مسلم لیگ (ن) کی جانب سے روا رکھے جانے والا طرزعمل، اہم امور سے علیحدہ رکھنے کی پالیسی سمیت خود سابق وزیراعظم کی لندن سے واپسی کے بعد ان کی لاتعلقی کے رویئے پر جب گلے شکوے کئے وہیں پی ٹی آئی کی حکومت کے خلاف جدوجہد سے لیکر عدم اعتماد کی تحریک تک جمعیت علمائے اسلام کی قربانیوں کا ذکر بھی شامل تھا۔ مذکورہ ذرائع کے مطابق اس حوالے سے سابق وزیراعظم نواز شریف نے مولانا کے شکوے شکایتوں کو حق بجانب قرار دیتے ہوئے انہیں اپنی مجبوریوں اور اپنے ساتھ ہونے والی ناانصافیوں کی تفصیلات سے بھی آگاہ کیا۔