خواجہ آصف نے ایک بار پھر اپوزیشن کو گھڑی دکھا دی

02 مارچ ، 2024

اسلام آباد (فاروق اقدس) قومی اسمبلی میں سپیکر کے انتخاب کے موقع پر ووٹ کاسٹ کرتے ہوئے خواجہ محمد آصف نے ایک بار پھر اپوزیشن کے ارکان کو گھڑی دکھا دی جس پر مسلم لیگ (ن) کے ارکان ڈیسک بجاکر اس منظر سے محظوظ ہوئے۔ خواجہ آصف نے کہا کہ انتخاب میں کامیابی پر اللہ تعالیٰ کا شکرادا کرتا ہوں، وزارت کا فیصلہ قیادت نے کرنا ہے پارلیمنٹ کی لابی میں گفتگو کرتے ہوئے خواجہ آصف کا کہنا تھا کہ اس اپوزیشن کو گھڑی دکھانا ہی کافی ہے کیونکہ ان کے مشتعل ہونے سے اندازہ ہوتا ہے کہ گھڑی دکھانے سے انہیں تکلیف کی شدت کچھ زیادہ ہی ہوتی ہے اس لئے یہ کام ’’باوقت ضرورت‘‘ ہوتا رہے گا۔ خواجہ آصف جو ماضی قریب میں خارجہ اور دفاع کی وفاقی وزارتوں پر بھی فائز رہے ہیں۔ اس سوال کے جواب میں کہ آپ وزیر خارجہ کا حلف اٹھا رہے ہیں یا وزیر دفاع کا، تو ان کا کہنا تھا کہ فی الحال تو ایم این اے ہی بن گیا ہوں جس پر اللہ تعالیٰ کا شکر گزار ہوں وزارت کا فیصلہ تو قیادت نے کرنا ہے۔ اس سوال کے جواب میں کہ مولانا فضل الرحمان ابھی تک ناراض ہیں، ڈیڈلاک کہاں پر ہے؟ جس پر خواجہ آصف کا کہنا تھا کہ سیاستدان اگر مولانا کو منانے میں کامیاب نہیں ہورہے تو میڈیا والے منا لیں۔