وزرا اعلیٰ سندھ و بلوچستان کی ملاقات ، اسمگلنگ کیخلاف مشترکہ اقدامات پر اتفاق

کراچی(اے پی پی) وزیر اعلیٰ سندھ اور وزیراعلیٰ بلوچستان نے بہت جلد دونوں صوبوں کی سرحدوں پر قانون شکنوں کے خلاف سخت کارروائی کرنے،اسمگلنگ اور ڈرگ مافیا کے خلاف بھی مشترکہ اقدامات کرنے پر اتفاق کیاہے،ترجمان وزیراعلیٰ سندھ کے مطابق یہ اتفاق نومنتخب وزیراعلیٰ سندھ سید مراد علی شاہ اور نومنتخب وزیراعلیٰ بلوچستان میر سرفراز احمد بگٹی کے درمیان وزیراعلیٰ ہائوس میں ہونے والی ملاقات میں کیا گیا، وزیراعلیٰ سندھ نے گوادر میں فلاحی اقدامات کے حوالے سے اپنے ہم منصب سے بات چیت کرتے ہوئے کہا کہ پی ڈی ایم اے سندھ نے گوادر میں سات نکاسی آب کی مشینیں بھیجی ہیں اور پی ڈی ایم اے سندھ اور بلوچستان پی ڈی ایم اے رابطے میں ہے اگر کسی دیگر مشینری کی ضرورت ہوئی تو فراہم کی جائے گی، وزیراعلیٰ بلوچستان نے کہا کہ گوادر میں پانی کی نکاسی اور دیگر بحالی کے اقدامات تیزی سے جاری ہیں، دونوں وزرائے اعلیٰ نے امن وامان کے حوالے سے بھی تبادلہ خیال کرتے ہوئے اتفاق کیا کہ بہت جلد دونوں صوبوں کی سرحدوں پر قانون شکنوں کے خلاف کارروائی کی جائے گی۔