ایوان سے براہ راست نشریات سرکاری ٹی وی کا ابہام

اسلام آباد (فاروق اقدس) وزارت عظمیٰ کیلئے کامیابی حاصل کرنیوالے قائد ایوان شہباز شریف جو آج وزیراعظم کے منصب کا حلف اٹھا رہے ہیں اور ناکام رہنے والے عمر ایوب کی تقاریر کے دوران ٹی وی چینلز سے دکھائی جانے والی تقاریر جنہیں ایوان سے براہ راست نشر کرنے کا اختیار صرف سرکاری ٹی وی کے پاس ہے ایک موقعہ پر ابہام کا شکار ہوگیا جب قائد ایوان شہباز شریف کی تقریر کے اختتام پر پارلیمانی روایات کے مطابق شکست کا سامنا کرنے والے امیدوار کو بھی تقریر کرنے کا وقت دیا جاتا ہے اور ان کی تقریر بھی براہ راست پیش کی جاتی ہے۔ متحدہ سنی اتحاد کونسل کی جانب سے پی ٹی آئی کے امیدوار جنہیں ان کے لیڈر عمران خان نے جیل سے وزیراعظم کیلئے نامزد کیا تھا ان کی تقریر جونہی شروع ہوئی ٹی وی چینلز سے ایوان کی براہ راست نشریات کا سلسلہ منقطع کر دیا گیا۔ اس وقت قومی اسمبلی کے ڈپٹی سپیکر اجلاس کی صدارت کر رہے تھے۔ عمر ایوب خان نے ان سے احتجاج کرتے ہوئے کہا کہ میری تقریر نشر نہیں کی جارہی، آپ رولنگ دیں کہ میری تقریر دکھائی جائے، تاہم تھوڑی دیر بعد یہ سلسلہ بحال ہوگیا جس کے بعد عمر ایوب نے پورے اطمینان سے تقریر مکمل کی کیونکہ ان کی تقریر میں مداخلت کرنے والے حکومتی اتحاد کے ارکان بھی ایوان سے رخصت ہوچکے تھے۔ تاہم یہ معلوم نہ ہوسکا کہ عمر ایوب کی تقریر کس کے کہنے پر روکی گئی اور کس کے کہنے پر دوبارہ بحال کی گئی۔