پنجاب ، سینیٹ کی ساتوں جنرل نشستوں پر امیدوار بلامقابلہ منتخب

لاہور،اسلام آباد،کوئٹہ(نمائندہ خصوصی ، ایجنسیاں) پنجاب سے سینیٹ کی جنرل نشستوں کیلئے 7 امیدوار تکنیکی طور پر بلامقابلہ منتخب ہوگئے ہیں۔الیکشن کمیشن اگلے دو روز میں بلا مقابلہ منتخب سینیٹر ز کا باضابطہ اعلان کریگا۔ الیکشن کمیشن کے مطابق 4 نشستیں ن لیگ، ایک حکومتی اتحاد اور 2 سنی اتحاد کونسل کے حصے میں آئیں۔ مسلم لیگ ن کے پرویز رشید ، ناصر محمود ، احد چیمہ اور طلال چوہدری ،حکومتی اتحاد کے حمایت یافتہ محسن رضا نقوی بھی تکنیکی طور پر کامیاب ہوگئے جبکہ سنی اتحاد کونسل کے راجہ ناصر عباس جعفری اور حامد خان ایڈووکیٹ بھی تکنیکی طور پر بلامقابلہ سینیٹر منتخب ہوئے ہیں۔سینیٹ الیکشن کے دوران بلوچستان میں سینیٹرز کو بلامقابلہ منتخب کرانے کا فیصلہ کر لیا گیا،ذرائع کے مطابق سیاسی جماعتوں کے مابین سینیٹر کے بلا مقابلہ انتخاب کا فارمولہ طے پانے کا امکان ہے، 11 نشستوں میں سے پیپلز پارٹی اور مسلم لیگ ن کو تین تین نشستیں مل سکتی ہیں،اسی طرح جمعیت علماء اسلام کو 2 نشستیں دی جائیں گی جبکہ بلوچستان عوامی پارٹی، نیشنل پارٹی اور عوامی نیشنل پارٹی کو ایک ایک نشست مل سکتی ہے۔