سینیٹ انتخابات، فہرست جاری، 18 بلامقابلہ منتخب، 30 کا انتخاب 2 اپریل کوہوگا

اسلام آباد(صباح نیوز)سینیٹ انتخابات، امیدواروں کی فہرست جاری، 18 بلامقابلہ منتخب، 30 کا انتخاب 2 اپریل ہوگا ۔الیکشن کمیشن آف پاکستان نے سینیٹ میں پنجاب کی 7 جنرل ن ، بلوچستان کی تما م 11 نشستوں پر امیدواروں کی بلامقابلہ کامیابی کا باضابطہ اعلان کردیا ۔ترجمان الیکشن کمیشن کے مطابق سینیٹ کی 48 خالی نشستوں پر انتخابات کے انعقاد کے لیے الیکشن پروگرام کا نوٹی فیکیشن 14 مارچ 2024 ء کو جاری کیا گیا جس کے مطابق سینیٹ کی 29 جنرل ، 8 خواتین ، 9 ٹیکنوکریٹ / علماء اور 2 غیر مسلم کی نشستوں پر انتخاب مورخہ 2 اپریل 2024 ء کو ہونا ہے ۔ اس انتخاب کے لیے کل 147 امیدواروں نے کاغذات نامزدگی جمع کروائے ۔ ریٹرننگ افسران نے امیدواروں کی حتمی لسٹ جاری کر دی ہے جس کے مطابق 18،امیدواران بلا مقابلہ منتخب ہوئے ہیں جس میں پنجاب کی 7 جنرل نشستوں ، اسی طرح بلوچستان کی 7 نشستوں ، 2 خواتین اور 2 ٹیکنوکریٹ / علماء کی نشستیں شامل ہیں ۔ 2 اپریل کو سینٹ کی 30 نشستوں پر انتحاب ہوگا جس کی تفصیل یہ ہے ۔فیڈرل کیپٹل ایک جنرل ،ایک ٹیکنو کریٹ،پنجاب کی دو خواتین،دو ٹیکنو کریٹ/ علماء، ایک غیر مسلم،سندھ کی 7 جنرل،2 خواتین،2 ٹیکنوکریٹ/علما،ایک غیر مسلم،خیبرپختونخوا کی 7 جنرل،2 خواتین اور 2 ٹیکنوکریٹ کی نشستیں شامل ہیں اور ان پر 59 امیدواران مد مقابل ہیں۔الیکشن کمیشن نے سینٹ انتخابات کے انعقاد کے تمام انتظامات مکمل کر لیے ہیں۔بیلٹ پیپرز کی طباعت اور ریٹرنگ افسران کو الیکشن میٹریل کی ترسیل کا کام بھی مکمل ہو گیا ہے۔