ملک کسی قسم کی افراتفری کا متحمل نہیں ہوسکتا‘ خورشید شاہ

اسلام آباد (خصوصی نمائندہ) پیپلز پارٹی کے سینئر رہنما سید خورشید احمد شاہ نے کہا ہے کہ پیپلز پارٹی اگر پنجاب میں کابینہ کا حصہ بنی تو پھر وفاقی کابینہ میں بھی شریک ہوگی۔ انہوں نے کہا کہ پی ٹی آئی کو پارلیمنٹ کے اندر اور باہر اپنا کردار ادا کرنا چاہئے کیوں کہ اب فیصلے سڑکوں پر نہیں پارلیمنٹ کے اندر ہوں گے۔ انہوں نے کہا کہ ملک کسی قسم کی افراتفری کا متحمل نہیں ہوسکتا اور کسی سیاسی جماعت کو کشیدگی کا راستہ نہیں اپنانا چاہئے۔ خورشید شاہ نے کہا کہ پیپلز پارٹی کی پہلی ترجیح پارلیمنٹ ہے اور ہم پوری قوت سے پارلیمنٹ کے ساتھ کھڑے ہیں اور کھڑے رہیں گے۔ انہوں نے کہا کہ کچھ بیرونی قوتیں ہماری ترقی سے خوفزدہ ہیں اور ایران سے گیس پائپ لائن میں رکاوٹ بھی اسی خوف کا حصہ ہے۔ خورشید شاہ نے کہا کہ مولانا فضل الرحمٰن سمجھدار سیاست دان ہیں اور اپنی سیاست کو بہتر طریقے سے آگے لیکر چلیں گے۔