لیاقت بلوچ سے اسد قیصر کا ٹیلیفونک رابطہ

اسلام آباد (نیوز رپورٹر) ترجمان جماعت اسلامی کے مطابق قائم مقام امیر جماعت اسلامی لیاقت بلوچ سے پی ٹی آئی رہنما اور سابق سپیکر قومی اسمبلی اسد قیصر نے ٹیلی فونک رابطہ کیا ہے جس میں دونوں سیاسی جماعتوں کے درمیان رابطے جاری رکھنے پر اتفاقِ رائے پایا گیا اور طے ہوا موجودہ حالات کے تناظر میں باہمی مشاورت جاری رکھی جائے گی۔ اسد قیصر نے لیاقت بلوچ سے کہا کہ غلط فہمیاں دور کر کے آگے بڑھنا چاہتے ہیں۔ ماضی میں رابطوں کے حوالے سے کنفیوژن پیدا ہوئی۔ لیاقت بلوچ نے واضح کیا کہ جماعت اسلامی پی ٹی آئی کارکنوں کی جمہوریت کے لئے جدوجہد اور ایثار کو قدر کی نگاہ دیکھتی ہے۔ انہوں نے کہا کہ جماعت اسلامی آئین، قانون کی بالادستی کے لئے جدوجہد کر رہی ہے۔ قومی قیادت کو باہمی اختلافات بھلا کر سیاسی و معاشی استحکام کے لئے کوششیں کرنا ہوں گی۔