عالمی ادارہ صحت اور بین الاقوامی اداروں کی ہدایات کیخلاف سگریٹ کمپنیوں کی مہم میں اضافے پر تشویش کا اظہار

اسلام آباد(آئی این پی)اسلام آباد میں قائم تھنک ٹینک کیپٹل کالنگ نے عالمی ادارہ صحت(ڈبلیو ایچ او)اور دیگر بین الاقوامی اداروں کی جانب سے طے کردہ ہدایات کی مخالفت کرنے کے لیے ملٹی نیشنل سگریٹ کمپنیوں کی مہم میں اضافے پر تشویش کا اظہار کیا ہے۔ تھنک ٹینک نے کہا ہے کہ انٹرنیشنل مانیٹری فنڈ (آئی ایم ایف)نے حکومت کو باقاعدہ سفارش کی ہے کہ پاکستان میں تیار ہونے والے تمام سگریٹوں پر یکساں ٹیکس عائد کیا جائے، چاہے وہ کسی بھی مقامی یا غیر ملکی برانڈ ز کے ہوں۔ ڈاکٹر حسن شہزاد نے کہا کہ حقیقت میں پاکستان میں سگریٹ کی قیمتیں دیگر علاقائی ممالک کے مقابلے میں کم ہیں۔ انہوں نے کہا کہ تمباکو نوشی میں کمی اور سگریٹ کی قیمتوں میں اضافے کے درمیان براہ راست تعلق ہے۔ انہوں نے تمباکو نوشی کے خلاف کام کرنے والے گروپوں پر بھی زور دیا کہ وہ حقیقی تحقیق کریں کیونکہ وہ پالیسی سازوں کے سامنے جو اعداد و شمار پیش کر رہے ہیں وہ پرانے ہیں ، ڈاکٹر شہزاد نے کہا کہ یہ وہ کمزوریاں ہیں جن سے ملٹی نیشنل کمپنیاں آسانی سے فائدہ اٹھاتے ہوئے اپنے ایجنڈے کو آگے بڑھاتی ہیں۔