مسجد اقصیٰ میں نماز عید کا روح پرور اجتماع ،غزہ کی شہید مساجد میں امن کی دعائیں

غزہ ( آن لائن ) مسجد اقصیٰ میں بھی نماز عید کا ایک روح پرور اجتماع ہوا، جب کہ غزہ کی شہید مساجد میں آنسوئوں کے ساتھ امن کے لیے دعائیں کی گئیں۔چھ ماہ سے جاری اسرائیلی جارحیت غزہ والوں کے حوصلے پست نہیں کر سکی ہے، محصور فلسطینی علاقے غزہ کی پٹی میں صہیونی درندوں نے وحشیانہ بمباریوں میں سیکڑوں مساجد شہید کر دی ہیں، تاہم ان شہید مساجد میں بھی غزہ والوں نے عید کی نماز ادا کی اور امن کے لیے دعائیں مانگیں، رفح کے پناہ گزیں کیمپوں میں بھی عید کے اجتماعات ہوئے۔مسجد اقصیٰ میں نماز عید کے روح پرور اجتماع میں لاکھوں افراد نے شرکت کی، اسرائیل کی جانب سے عائد پابندیوں کے باوجود بیت المقدس کی بابرکت مسجد میں صبح سویرے شہری جوق در جوق نماز عید کے لیے امڈ آئے، یروشلم میں اسلامی اوقاف کے محکمے نے ایک بیان میں بتایا کہ قابض اسرائیلی حکام کی جانب سے الاقصیٰ سے زبردستی نکالے گئے متعدد شہریوں نے مسجد کے اطراف کی گلیوں میں نماز عید ادا کی۔ رپورٹ کے مطابق پولیس نے جوانوں کی آئی ڈیز چیک کیں، صرف 60 سال سے زیادہ عمر کے مردوں اور 50 سال سے زیادہ عمر کی خواتین کو آنے کی اجازت دی گئی، مقبوضہ مغربی کنارے سے بہت کم لوگوں کو یہاں آنے کی اجازت دی گئی، لیکن پھر بھی ہزاروں لوگ پہنچے۔