عمران خان اور شاہ محمود نے اڈیالہ جیل میں نماز عید ادا کی ، گلے ملے

راولپنڈی ( آن لائن ) بانی پی ٹی آئی اور شاہ محمود قریشی نے اڈیالہ جیل میں عید کی نماز ادا کی۔راولپنڈی کی اڈیالہ جیل کی مرکزی جامع مسجد میں عید کا بڑا اجتماع ہوا۔جیل ذرائع کے مطابق بانی پی ٹی آئی اور شاہ محمود قریشی نے عید کی نماز ادا کی۔بانی پی ٹی آئی اور شاہ محمود قریشی ایک دوسرے سے گلے ملے، جیل افسران نے بانی پی ٹی آئی کے ساتھ نمازِ عید ادا کی۔ذرائع کے مطابق جیل میں نماز ادائیگی کے دوران سیکیورٹی ہائی الرٹ رہی۔ جبکہ عید الفطر کے موقع پر بشریٰ بی بی کو بانی پی ٹی آئی سے ملاقات کیلئے اڈیالہ جیل لایا گیا۔بشریٰ بی بی اور بانی پی ٹی آئی کی ملاقات کے لیے اسلام آباد ہائی کورٹ نے حکم دیا تھا۔بشریٰ بی بی اور بانی پی ٹی آئی کی ملاقات تقریباً ایک گھنٹہ جاری رہی۔ذرائع کے مطابق بشریٰ بی بی اور بانی پی ٹی آئی کی ملاقات کانفرنس روم میں کرائی گئی جس کے بعد پولیس بشریٰ بی بی کو اڈیالا جیل سے لیکر واپس بنی گالا لے گئی۔