ملکی تاریخ میں پہلی بار آٹا تھیلا 500روپے سستا ہو گیا

اسلام آباد(رپورٹ:حنیف خالد)پنجاب سمیت ملک بھر میں آٹا سستا ہو گیا ہے کیونکہ وزیراعلیٰ محترمہ مریم نواز کی عوام دوست پالیسیوں کے نتیجے میں عید الفطر کے بعد 20کلوآٹے تھیلے کی قیمت 2800روپے سے 500روپے کم ہو کر 2300روپے تک آ گئی ۔ عیدالفطر کے بعد سندھ کے بعد پنجاب کی گندم کی فصل آنا شروع ہو گئی ہے تو اسکے نتیجے میں 20کلو آٹے کی قیمت میں مزید 300روپے کے لگ بھگ چند روز میں کم ہو جائے گی اور 20کلو آٹا تھیلا 2800روپے کی بجائے 2000روپے میں ملا کرے گا اور جون جولائی میں نئی فصل کی گندم منڈی میں پہنچے گی تو طلب اور رسد کے اصول کے تحت آٹے اور گندم کی مصنوعات میدے سوجی چوکر فائن کی قیمتوں میں بتدریج کمی آ جائے گی۔ حکومت پنجاب نے چار سال کی پابندی کے بعد گندم کی نئی فصل سے فلور مل مالکان کو اپنی ضرورت کی گندم پیدا کرنے والے اضلاع سے خریدنے کی اجازت دیدی ہے۔