بلوچستان میں غیر ملکی سرمایہ کاری کیخلاف بات کرنا سازشی بیانیہ ہے‘ طلال چوہدری

اسلام آباد (خصوصی نامہ نگار) پاکستان مسلم لیگ (ن) کے سینیٹر طلال چوہدری نے کہا ہے کہ فروہ فسادیہ کو بلوچستان جا کر بھی شہدائے وطن کے ساتھ یک جہتی اور دہشت گردوں کی مذمت کا حوصلہ نہیں، اپوزیشن لیڈر عمر ایوب کے بیان پر ردعمل ظاہر کرتے ہوئے (ن) لیگی رہنما نے کہا کہ بلوچستان میں بیٹھ کر غیر ملکی سرمایہ کاری کے خلاف بات کرنا سازشی بیانیہ کا تسلسل ہے۔ امدادی سامان پر علی امین اور ایک ٹک ٹاکر کی تصویر چھاپ کر 9 مئی کے فسادی لشکر نے ایک اور یوٹرن لیا ہے۔ ججوں کی خلاف ریفرنس بنانے اور ان کی نوکریاں ختم کرانے والے آج عدلیہ کی آزادی پر اپنی سیاسی دکانداری کر رہے ہیں۔ فساد، انتشار اور 9 مئی کی سوچ کی آگ کو ’’سیاسی شعور‘‘ کہنا جہالت کی انتہا ہے۔ معیشت کی بہتری اور مہنگائی میں کمی کے اثرات آتے ہی ملک کو ڈیفالٹ کے کنارے پہنچانے والے پھر متحرک ہوگئے ہیں۔