نوشکی، قومی شاہراہ پر بس سے اتار کر 9 مسافر قتل، دوسری بس پر فائرنگ، مزید 2 ہلاک

کراچی (ٹی وی رپورٹ) نوشکی کے قریب قومی شاہراہ پر بس سے اتار کر 9مسافروں کو اغواء کرکے قتل کردیا گیا۔

مسافر بس کوئٹہ سے تفتان جارہی تھی، مقتولین میں 8 مزدور بتائے جاتے ہیں، جبکہ نوشکی ہی میں دوسرے واقعے میں ایک اور بس پر فائرنگ کے نتیجے میں مزید 2مسافر ہلاک جبکہ تین زخمی ہوگئے۔

واقعے کے بعد سیکورٹی فورسز نے ملزمان کی گرفتاری کیلئے علاقے میں سرچ آپریشن شروع کر دیا ہے۔

جیو نیوز کے مطابق مقامی پولیس اس کی تصدیق کی ہے کہ جن 8 مسافروں کو بس سے اتار کراغوا کیا گیا تھا۔ قریبی پہاڑی کے قریب واقعہ پل کے نیچے سے ان کی لاشیں ملی ہیں جنہیں وہاں سے ہسپتال منتقل کیا گیا ہے۔

ٹیچنگ ہسپتال کے ذرائع کا بتانا ہے کہ جو مقتولین ہیں ان کے جسم کے مختلف حصوں پرگولیاں ماری گئی ہیں۔

ان کی شناخت اور باقی جو دیگر معاملات ہیں وہ پولیس اور دیگر تفتیشی ادارے کررہے ہیں۔ سرچ آپریشن بھی جاری ہے لاشوں کو پہنچانے کے بعد ابھی تک کسی اغوا کار کی گرفتاری یا اس کے مارے جانے کی کوئی اطلاعات موصول نہیں ہوئیں۔

بس کی تصدیق اور شناخت جو مسافر تھے ان کے حوالے سے کچھ نہیں پتہ لگ سکا ماسوائے اس کے کہ جو8 افراد جنہیں لے جایا گیا وہ مزدور بتائے جارہے ہیں۔

دریں اثناء آناً فاناًہی فائرنگ کا ایک اور واقعہ ہواجس میں ایک شخص جاں بحق چار زخمی ہوئے ۔

گاڑی اغوا نہیں ہوئی تھی بس کو روک کر اس میں سے مسافروں کو اتارا تھا۔اسی دوران وہاں اسی قومی شاہراہ پر دوسری گاڑی آئی جسے رکنے کا اشارہ کیا گاڑی نہ رکنے پرانہوں نے گاڑی پر فائرنگ کی جس میں ڈرائیو رجاں بحق ہوادیگر چار افراد اس میں زخمی ہوئے ۔ لیکن جو مغوی تھے انہیں لے کراغوا کار وہاں سے فرار ہونے میں کامیاب ہوئے۔

علاوہ ازیں دوسری گاڑی میں جس پر فائرنگ ہوئی تھی جس میں ایک شخص کے جاں بحق ہوگیا۔ بحق شخض نوشکی سے تعلق رکھنے والے ایم پی اے غلام دستگیر بادینی کے قریبی عزیز بتائے جاتے ہیں جب کہ دیگر زخمی افراد ہیں وہ بھی ان کے علاقے سے تعلق رکھتے ہیں ان کے عزیز بتائے جارہے ہیں۔ تاہم ان کی شناخت کے حوالے سے مزید اپ ڈیٹ آنا باقی ہیں۔