وساکھی میلہ، بھارت سے تین ہزار سکھ آج پاکستان پہنچیں گے

اسلام آباد (نیوز رپورٹر) سکھ مذہب کے تہوار وساکھی میلہ کی تقریبات میں شرکت کیلئے بھارت سے تین ہزار سکھ یاتری آج ہفتہ کو واہگہ بارڈر کے راستے پاکستان پہنچیں گے جہاں متروکہ وقف املاک بورڈ کے اعلیٰ حکام اور پردھان PSGPCسمیت دیگر سکھ رہنما ان کا استقبال کریں گے۔ بورڑ ترجمان کے مطابق مہمانوں کی رہائش سکیورٹی ٹرانسپورٹ میڈیکل سمیت تمام انتظامات مکمل کر لئے گئے ہیں۔ وساکھی میلہ کی مرکزی تقریب 14 اپریل کو گوردوارہ پنجہ صاحب حسن ابدال میں منعقد ہوگی۔ ٹرسٹ بورڈ کی جانب سے گوردوارہ کو خوبصورت انداز میں سجانے کے علاوہ دیگر خصوصی انتظامات کئے گئے ہیں۔ یاتری اس بار روڈ کی بجائے ٹرین کے ذریعے سفر کریں گے۔ دنیا بھر سے تقریباً دس ہزار سکھ پاکستان پہنچ رہے ہیں۔