ملک بھر میں عید الفطرمذہبی جوش و خروش کے ساتھ منائی گئی

اسلام آباد(نمائندہ خصوصی،نیوز رپورٹر، خصوصی نامہ نگار،اے پی پی)ملک بھر کی طرح وفاقی دارالحکومت اسلام آباد میں بدھ کو عید الفطر مذہبی جوش وجذبے اور عقیدت و احترام کے ساتھ منائی گئی، نماز عید کے روح پرور اجتماعات میں امت مسلمہ اور ملک اور قوم کی سلامتی، ترقی اور خوشحالی کیلئے خصوصی دعائیں مانگی گئیں، صدر مملکت آصف علی زرداری نے نواب شاہ ، وزیرِ اعظم شہباز شریف ،وزیر داخلہ محسن نقوی ،سپیکر ایاز صادق نے لاہور اور چیئرمین سینٹ یوسف رضا گیلانی نےملتان میں عید الفطر منائی ۔وفاقی دارالحکومت میں عیدالفطر کا مرکزی اجتماع فیصل مسجد میں منعقد ہوا، پاکستان کے دورہ پر آئے مسلم ورلڈ لیگ کے سیکرٹری جنرل محمد بن عبدالکریم العیسی نے خطبہ دیا اور نماز عید کی امامت کرائی۔ اعلی حکومتی شخصیات اور مسلمان ممالک کے سفرا اور بڑی تعداد میں شہریوں نے فیصل مسجد میں نماز عید ادا کی،نماز کے بعد پاکستان کی سلامتی اور فلسطینی مسلمانوں کے لیے خصوصی دعائیں کی گئیں اور فلسطینی عوام سے اظہار یکجہتی کیا گیا،نماز عید کے مرکزی اجتماع میں شہری اسرائیلی جارحیت کیخلاف غزہ اور فلسطینی عوام سے اظہار یکجہتی کے لیے فلسطینی جھنڈے لے کر آئے اور نماز عید ادا کی۔ بعد ازاں فیصل مسجد کے باہر اسرائیل کی جانب سے فلسطینیوں کی نسل کشی کے خلاف احتجاج کیا گیا۔ اس موقع پر پولیس نے مقامی رضاکاروں کے ساتھ مل کر سکیورٹی کے سخت انتظامات کررکھے تھے۔