آزاد اور ذمہ دار میڈیا مضبوط ریاست کا آئینہ دار ہے‘ سینیٹر طلحہ محمود

اسلام آباد ( خصوصی نامہ نگار) پاکستان پیپلز پارٹی کے سینیٹر طلحہ محمود نے کہا کہ آزاد اور ذمہ دار میڈیا مضبوط ریاست کا آئینہ دار ہے دیگر تین ستونوں پر میڈیا کی گہری نظر ہی مسائل کا حل ہے۔ خدمت خلق انسانیت کی معراج ہے۔ ان خیالات کا اظہار انہوں نے آل پاکستان نیوز پیپر اینڈ الیکٹرانک میڈیا ایمپلائز کنفیڈریشن (ایپنک) کے زیراہتمام میڈیا ورکرز اور صحافیوں میں رمضان و عید پیکج کی تقسیم کے موقع پر مقررین نے خطاب کرتے ہوئے کیا۔ ایپنک کے مرکزی چیئرمین محمد صدیق انظر نے مہمانوں کا استقبال کیا جبکہ تقریب کے مہمان خصوصی سینیٹر محمد طلحہ محمود تھے۔ نیدرلینڈز ایمبیسی کے ڈپٹی ہیڈ آف مشن حاجو پرو کلوئٹ اور تاجکستان ایمبیسی کے قائم مقام سفیر سعید جان کے علاوہ منیجنگ ڈائریکٹر اے پی پی محمد عاصم کھچی نیشنل پریس کلب اسلام آباد کے صدر اظہر جتوئی نے تقریب میں خصوصی شرکت کی۔ تقریب سے کلیم شمیم، ڈاکٹر سعدیہ کمال، اظہر سلطان،راجہ جاوید خان اور دیگر نے خطاب کیا۔