BJPنے ملک میں خوف و دہشت کا ماحول پید ا کر رکھا ہے، چدمبرم

نئی دہلی(کے پی آئی)بھارت کے سابق وزیرخزانہ و انڈین نیشنل کانگریس کے سینئر رہنما پی چدمبرم نے کہا ہے کہ بی جے پی حکومت نے ملک میں خوف و دہشت کا ماحول پید ا کر رکھا ہے ، حزب اختلاف کے کئی رہنماء جیلوں میں ہیں اور انکی ضمانت مسترد کر دی گئی ہے حالات یہی رہے تو بھارت انتخابی آمریت بن جائے گا۔ اپنے ایک انٹرویو میں انہوں نے کہا کہ بی جے پی ، آر ایس ایس نے خوف ودہشت کا ایسا ماحول پیدا کر دیا ہے کیونکہ ہرکوئی بات کرنے سے خوف محسوس کر تا ہے، تحقیقاتی ادارے انفورسمنٹ ڈائریکٹوریٹ (ای ڈی) اور محکمہ انکم ٹیکس ان حلقوں میں زیادہ فعال ہیں جہاں مخالف امیدوار مضبوط ہیں۔ انہوں نے کہا کہ مودی کے دور حکومت میں بھارت کمزور ہوتا چلا گیا ، مہنگائی اور بے روزگاری عروج پر ہے ،عوام بی جے پی کی آمریت کے خلاف آواز اٹھائیں۔