مقبوضہ کشمیر میں انسانی حقوق کارکنوں کیخلاف کارروائیاں تشویشناک ہیں

ڈبلن(این این آئی) آئرلینڈ میں قائم انسانی حقوق کی تنظیمʼʼفرنٹ لائن ڈیفنڈرز ʼʼنے مودی کی زیر قیادت ہندو توا بھارتی حکومت کی طرف سے مقبوضہ کشمیر میں انسانی حقوق کے محافظوں اور صحافیوں کو درپیش ظلم و ستم پر تشویش کا اظہار کیا اورکہا ہے کہ سجاد گل اور دیگر غیر قانونی نظر بندوں کو فوری طور پر رہا ، ان کے خلاف تمام کارروائیاں ختم کریں ۔ فرنٹ لائن ڈیفنڈرز نے اپنی ویب سائٹ پر پوسٹ ایک بیان میں کشمیری صحافی سجاد گل کی مسلسل نظربندی کا حوالہ دیتے ہوئے کہا کہ مقبوضہ کشمیر ہائیکورٹ نے انکی کالے قانون پبلک سیفٹی ایکٹ کے تحت نظربندی نومبر 2023 میں کالعدم قرار دیدی تھی لیکن اسکے باوجود انہیں تاحال رہا نہیں کیا اور اپنے خاندان سے بہت دور ایک بھارتی جیل میں مسلسل قید ہیں۔سجاد گل کو 5 جنوری 2022 کو محض اس وجہ سے گرفتار کیا گیا تھا کیونکہ انہوں نے بھارتی فورسز کے ہاتھوں ایک تلاشی آپریشن کے دور ان شہید ہونے والے ایک شہری کے اہلخانہ کے احتجاج کی ویڈیو اپنے سوشل میڈیا اکائٹ پر پوسٹ کی تھی۔ انسانی حقوق کی تنظیم نے بھارتی حکام سے مطالبہ کیا کہ وہ سجاد گل اور غیر قانونی طور پر نظر بندی دیگر صحافیوں، انسانی حقوق کے محافظوں کو فوری طور پر رہا اور ان کے خلاف تمام کارروائیاں ختم کریں ۔