مودی نے مقبوضہ ریاست کا درجہ تبدیل کر کے کشمیریوں کی توہین کی، کانگریس

جموں( جنگ نیوز)مقبوضہ کشمیر میں انڈین نیشنل کانگریس نے کشمیریوں کے تمام بنیادی حقوق سلب کرنے پر بھارتی حکومت کو شدید تنقید کا نشانہ بنایا اورکہا کہ مودی حکومت نے مقبوضہ ریاست کا درجہ تبدیل کر کے کشمیریوں کی توہین کی، بی جے پی شکست کے خوف سے انتخابات نہیں کر ا رہی ، کشمیری ریاستی درجے کا حق واپس لے کر رہیں گے۔ انڈین نیشنل کانگریس مقبوضہ کشمیر شاخ کے قائم مقام صدر رمن بھلا نے راجوری کے علاقے سندر بنی میں عوامی اجتماعات خطاب کرتے ہوئے کہا کہ بی جے پی حکومت نے جموں وکشمیر کا ریاستی درجہ اور علاقے کے لوگوں کے حقوق چھین کر شدید دھوکہ دہی کی ہے،انہوں نے کہا کہ بھارتی حکومت نے مقبوضہ علاقے کے لوگوں کو روزی روٹی سے محروم کر دیااور کسانوں کی زمینیں چھین لیں، مہنگائی عروج پر ہے اور بے روزگاری نے تمام ریکارڈ توڑ دیے ہیں،انہوں نے کہا کہ مودی حکومت نے جمو ں وکشمیر کا ریاستی درجہ ختم کر کے کشمیریوں کی توہین کی ہے ۔ کشمیری گزشتہ پانچ برس سے زائد عرصے سے اسمبلی انتخابات سے محروم ہیں۔ انہوں نے کہا کہ بی جے پی علاقے میں اس لیے اسمبلی انتخابات نہیں کر ا رہی کیونکہ اسے شکست کا خوف لاحق ہے، کشمیری ریاستی درجے کا حق واپس لے کر رہیں گے۔