پاکستان نےایک ارب ڈالر کے یورو بانڈز کی بروقت ادائیگی کردی،عالمی اداروں کا اعتماد بلند ہوگا،ماہرین

14 اپریل ، 2024

راولپنڈی(مانیٹرنگ ڈیسک )پاکستان نےایک ارب ڈالر کے یورو بانڈز کی بروقت ادائیگی کردی۔سٹیٹ بینک کے مطابق پاکستانی یورو بانڈ ہولڈرز کو ادائیگی 12 اپریل کو ایجنٹ بینک کے ذریعے کی گئی، ادا کی گئی رقم میں قرض کا اصل اور سود شامل ہیں۔ پاکستان کے مرکزی بینک کے مطابق ادائیگی کےبعدپاکستان کا عالمی مارکیٹ میں یوروبانڈزکا قرض7 ارب ڈالر رہ گیا ہے۔ادائیگی سے متعلق مرکزی بینک کے مطابق انٹرنیشنل یورو بانڈز کی ادائیگی ایجنٹ بینک کے ذریعے کی گئی ہے، جو بانڈز ہولڈرز کو ادائیگی کرے گا۔ پاکستان نے 2014ء میں ایک ارب ڈالر کے یورو بانڈز کا اجراء کیا تھا اور یہ ایک ارب ڈالر کے یورو بانڈز اپریل 2024ء میں میچور ہو گئے تھے۔ماہرین کا کہنا ہے کہ حکومت نے میچورنگ بانڈز کی بروقت ادائیگی کی ہے۔ جس سے پاکستان کی معیشت پر سرمایہ کاروں اور عالمی اداروں کا اعتماد بلند ہوگا۔