لداخ ، بھارتی صنعتکاروں کوزمینیں فروخت کرناانتہائی تشویشناک ہے، LAB

14 اپریل ، 2024

لیہہ (اے پی پی)مقبوضہ کشمیر کے خطے لداخ میں لیہہ ایپکس باڈی (ایل اے بی)نے کہا ہے کہ تنظیم کا ایک نمائندہ وفد آنے والے دنوں میں لائن آف ایکچوئل کنٹرول کے قریب واقع علاقے چانگ تھانگ تک پیدل مارچ کرے گا جسکا مقصد یہاں کے کسانوں کو بھارتی صنعت کاروں کو زمینیں فروخت کرنے کے سنگین مضمرات سے آگاہ کرنا ہے۔کشمیر میڈیاسروس کے مطابق معروف ماحولیاتی کارکن سونم وانگچک نے لیہہ میں ایک پریس کانفرنس میں یہ اعلان کیا کہ یہ مارچ بہت جلد شروع کیا جائے گا لیکن تاریخوں کا فیصلہ ہونا ابھی باقی ہے۔انہوں نے کہا کہ بیس کے قریب رہنما اس مارچ کا حصہ ہونگے جو گائوں گائوں جا کر لوگوں کو بھارتی صنعت کاروں کو زمینیں فروخت کے نقصانات سے آگاہ کریں گے۔ انہوں نے کہا کہ علاقے میں چالیس ہزار سے زائد ایکڑ رقبے پر مشتمل چراگاہیں بھارتی صنعت کاروں کو دی جا رہی ہیں جو انتہائی تشویشناک ہے۔