محاذ آرائی نقصان دہ،جنگ بڑھنا اسرائیل کے سوا کسی کے مفاد میں نہیں، ملیحہ لودھی

اسلام آباد(جنگ نیوز)اقوامِ متحدہ میں پاکستان کی سابق مندوب ملیحہ لودھی نے کہا ہے کہ پہلی بار ایران اور اسرائیل کی براہِ راست محاذ آرائی ہوئی ہے، جنگ خطے میں پھیلی تو پاکستان پر بھی اثرات ہوں گے، جنگ بڑھنا اسرائیل کے سوا کسی کے مفاد میں نہیں۔میڈیا سے گفتگو کرتے ہوئے انہوں نے کہا کہ ایرانی سفارت خانے پر اسرائیلی حملہ عالمی قوانین کی خلاف ورزی تھی جس کے بعد ایران پر اندرون اور بیرونِ ملک سے بہت دباؤ تھا، ایران نے صرف فوجی ٹارگٹس پر حملے کیے، شہری تنصیبات پر نہیں اسرائیل چاہے گا کہ امریکا جنگ میں ملوث ہو جائے لیکن امریکا نہیں چاہے گا کیونکہ امریکی عوام کی رائے اسرائیل کے خلاف ہے، امریکی عوام بھی چاہتے ہیں کہ غزہ جنگ ختم ہونی چاہیے، چین اور روس بھی چاہیں گے کہ ناصرف غزہ بلکہ مشرقِ وسطیٰ میں بھی جنگ بند ہو، سعودی عرب یا کوئی اور ملک جنگ میں اضافہ نہیں چاہے گا، پاکستان سمیت مسلم ممالک کا متفقہ جواب آنا چاہیے۔