کراچی میں افغان قونصلیٹ کے بنگلے پر افغان طالبان کا قبضہ

کراچی (نمائندہ جنگ )جمشید روڈ پر واقعہ افغان قونصلیٹ کے بنگلے پر مبینہ طور پر قبضہ کا معاملہ حل نہ ہو سکا۔11 اپریل کو تھانہ جمشید کوارٹرز میں درخواست گزاروں کی جانب سے جمع کروائی گئی درخواست کے مطابق عامل کالونی میں واقع بنگلہ نمبر 82 جس میں دائود یونیورسٹی کے کے طلباء رہائشی پذیر ہیں میں کچھ افراد اسلحہ سمیت داخل ہوئے اور وہاں موجود طلبہ کو مارا اور گالم گلوچ کی۔ان افراد نے کمروں کے تالے توڑے اور سامان بھی باہر نکال دیا جبکہ وہ افراد خود کو افغان طالبان ظاہر کر رہے تھے اور کہا کہ ہم افغانستان میں جہاد کر رہے ہیں اور زخمیوں کا یہاں علاج کر رہے ہیں۔دوسری جانب ذرائع کا کہنا ہے کہ مذکورہ بنگلہ افغان قونصلیٹ کی ملکیت ہے۔ افغان قونصلیٹ کا عملہ گزشتہ روز بنگلہ پر پہنچا تھارہائشی طلبہ نے ویڈیو بنا کر وائرل کی اور معاملے کو غلط رنگ دیا۔ذرائع کا کہنا ہے کہ سابق افغان صدر اشرف غنی کے دور میں یہ بنگلہ بغیر کسی تحریری معاہدے کے مذکورہ طلبہ تنظیم کو دیا گیا تھا۔ایس ایس پی ایسٹ ڈاکٹر فرخ رضا کا کہنا ہے کہ پراپرٹی کے معاملات سے متعلقہ محکمہ ریونیو ہے۔ قبضہ دینا یا چھڑوانا ان کے دائرہ اختیار میں ہے۔