کراچی، گھر پر آسمانی بجلی گرنے سے چھت اور دیواروں پر دراڑیں پڑگئیں

کراچی (ایجنسیاں، نیوز ڈیسک) کراچی کے مختلف علاقوں میں گرج چمک کے ساتھ تیز اور ہلکی بارش کے باعث شہر کا موسم خوشگوار ہوگیا جبکہ ناظم آباد اور کلفٹن میں آسمانی بجلی گرنے سے مکان کی چھت اور دیواروں میں دراڑیں پڑ گئیں۔ تفصیلات کے مطابق آئی آئی چندریگر روڈ، ماڑی پور، صدر، میٹروول، گلستان جوہر، ملیر، لانڈھی، کورنگی، کیماڑی، یونیورسٹی روڈ، شاہراہ فیصل کے علاقوں میں بارش ہوئی۔ ایف بی ایریا، شاہ فیصل کالونی، قائد آباد، کلفٹن، نارتھ کراچی، ناظم آباد، نارتھ ناظم آباد، سائٹ، شیرشاہ میں بھی بادل برسے، بارش کے باعث شہر کے مختلف علاقوں میں پانی جمع ہوگیا۔ محکمہ موسمیات کی جانب سے جاری اعداد و شمار کے مطابق سب سے زیادہ بارش ناظم آباد میں 21 ملی میٹر ریکارڈ کی گئی، گلشن حدید میں 20، فیصل بیس پر 17، یونیورسٹی روڈ پر 14 اعشاریہ 5 اور ایئرپورٹ پر 11 ملی میٹر بارش ریکارڈ کی گئی۔