بلیدہ سمیت بارش سے متاثرہ تمام علاقوں میں امداد پہنچائی جائے، جان بلیدی

کراچی(پ ر) نیشنل پارٹی کے مرکزی سیکرٹری جنرل سینیٹر جان محمد بلیدی نےبیان میں کہاہے کہ طوفانی بارشوں نے بلیدہ سمیت بلوچستان بھر میں تباہی کی ہے، حکومت بلوچستان اور وفاقی حکومت کے سیلابات سے نمٹنے کے اداروں کو فوری طور پر ریلیف اقدامات کا سلسلہ شروع کرنا چاہیے۔انہوں نے کہاکہ طوفانی بارشوں نے بلیدہ کے مختلف علاقوں میں لوگوں کے کھڑی فصلات، سولر نظام اور بندات کو ملیامیٹ کردیا ہے، گندم کی کھڑی فصلیں دریا برد ہوئی ہیں جبکہ طوفانی ہواؤں نے سولروں کو شدید نقصان پہنچایا جبکہ لوگوں کے بندات اور ٹیوب ولوں کو بھی شدید نقصان ہوا ہے لیکن تاحال پی ڈی ایم اے اور وفاقی ادارے حرکت میں نہیں آئے ہیں، انہوں نے صوبائی حکومت سے مطالبہ کیا کہ بلوچستان کے تمام علاقوں میں فوری طور پر ریلیف کا سلسلہ شروع کیا جائے اور ضروری امداد فوری طور پر بلیدہ سمیت تمام علاقوں میں پہنچانے کا بندوبست کیا جائے، سینٹر جان بلیدی نے کہاکہ بلیدہ اس وقت سیلابی ریلوں، بارش اور طوفانی ہواؤں سے متاثر ہوا ہے اور ہورہا ہے کیونکہ تاحال بارش اور تیز ہواوں کا سلسلہ جاری ہے، جس سے مزید نقصانات کا خدشہ موجود ہے۔