پشین جلسے میں قائد جمعیت کیخلاف نازیبا نعرے صوبے کا کلچر نہیں، جمعیت

کوئٹہ(پ ر) جمعیت علماء اسلام ضلع کوئٹہ کے امیر مولانا عبد الرحمٰن رفیق سینئر نائب امیر مولانا خورشید احمد جنرل سیکرٹری حاجی بشیر احمد کاکڑ نائب امیر مولانا محمد ایوب ڈپٹی سیکرٹری جنرل مولانا حافظ مسعود احمد سیکرٹری اطلاعات عبدالغنی شہزاد سیکرٹری مالیات میر سرفراز شاہوانی ایڈووکیٹ سالار حافظ سید سعداللہ آغا حاجی صالح محمد مولانا محمد عارف شمشیر مولانا مفتی نیک محمد فاروقی اور دیگر نے 13اپریل کو پشین میں اپوزیشن جماعتوں کے جلسے میں قائد جمعیت مولانا فضل الرحمنٰ کے خلاف نازیبا نعروں کی مذمت کرتے ہوئے کہا ہے کہ پشین جلسے میں قائد جمعیت کے خلاف نازیبا نعرے ہمارے صوبے کا کلچر نہیں،میزبان جماعت کی خاموشی پشتون روایات کے منافی ہے ، سیاسی رہنماؤں محمود خان اچکزئی اور سردار اختر جان مینگل کی موجودگی میں پی ٹی آئی کے کارکنوں کی جانب سے نازیبا نعرے باعث شرمندگی ہیں، قائد جمعیت مولانا فضل الرحمٰن نے روز اول سے 2018 کی طرح 2024کے انتخابات کو مسترد کرتے ہوئے سب سے پہلے تحریک چلانے کا اعلان کیا لیکن افسوس کہ اپوزیشن کے سب سے بڑے رہنماء جو پی ڈی ایم کے سربراہ رہے اور ان کی عظیم جدوجہد کی بدولت ملک کی تمام سیاسی جماعتیں ایک پلیٹ فارم پر متحد ہوئیں ان کے خلاف پشین کی سرزمین پر نازیبا نعرے اپوزیشن نہیں اسٹیبلشمنٹ کی خوشنودی کیلئے لگائے گئے جس کی جمعیت علماء اسلام ضلع کوئٹہ مذمت کرتی ہے، ضروری تھا کہ دوران جلسہ میزبان جماعت کے اسٹیج سیکرٹری اسی وقت ان نعروں سے لاتعلقی کا اظہار کرتے ہوئے مخصوص اور غیر مہذب تربیت کے حامل پارٹی کارکنوں کو منع کرتے مگر ایسا نہیں کیا گیا جس سے تمام جمہوری کارکنوں اور پشین کے عوام کی دل آزاری ہوئی ہے ۔