معاشی صورتحال انتہائی گمبھیر، بلوچستان مسائلستان بن گیا، کریم نوشیروانی

کوئٹہ( پ ر) سابق صوبائی وزیر میر کریم نوشیروانی نے اپنے ایک بیان میں کہا ہے کہ بلوچستان کی صورتحال انتہائی گمبھیر ہے، صوبہ مسائلستان بن چکا ہے۔ماضی کی حکومتوں کی غلط پالیسوں سےصوبے کو مالی مسائل کا سامنا ہے۔ملک اور صوبے کی معاشی صورتحال ٹھیک نہیں۔ دعا ہے کہ ملک کے پاس بجٹ سازی کیلئے پیسہ ہو ۔ ملک اس وقت آئی ایم ایف کی گود میں ہے۔ اور کھربوں روپے کے ٹیکسوں سے عوام بے حال ہیں۔ آئی ایم ایف کی جانب سے ٹیکسوں کا سلسلہ ابھی نہیں تھما ہے۔اور عوام کی چیخیں نکل رہی ہیں۔ انہوں نے کہا کہ حکومت کے پاس وہ وسائل نہیں کہ اس گمبھیر معاشی صورتحال سے آسانی سے نکل سکے۔ ان حالات میں ماضی میں تھال میں کھانے والے اب پلیٹ میں گزارا کرنا سیکھیں اور حقیقت پر مبنی بجٹ بنانے میں کردار ادا کریں۔ انہوں نے کہا کہ ماضی کی حکومتوں کی شاہ خرچیوں اور غیر ترقیاتی اخراجات سے ملک مالی مسائل کا شکار ہوا۔ سیاسی رہنماؤں کو اس معاشی گرداب سے نکلنےکیلئے حکومت کا ساتھ دینا چاہئیے۔ بلوچستا ن کی معاشی صورتحال ایسی انہیں کہ 60 ارکان کو وزیر ، مشیر بنایا جا سکے۔ماضی میں جو کچھ ہوا اس کو دہرانا نہیں چاہئیے۔ انہوں نے کہا کہ وزیر اعلیٰ سرفراز بگٹی صوبے کی یکساں ترقی چاہتے ہیں ۔ صوبے میں تعمیر و ترقی اس وقت ہو گی جب اپوزیشن بھی اسی جذبے سے حکومت کیساتھ تعاون کریگی۔ آئی ایم ایف سے جان چھڑانے کیلئے ضروری ہے کہ اپوزیشن حکومت کو کندھا دے اور تمام قوتیں اس دلدل سے نکلنے کیلئے اپنا تمام زور ایک سمت میں ہی لگائیں۔ انہوں نے کہا کہ ملک کو درپیش دوسرا بڑا مسئلہ دہشتگردی ہے۔ جب تک مہنگائی، کرپشن اور دہشت گردی پر قابو نہیں پایا جاتا ملک ترقی نہیں کرسکتا۔