کراچی سے لاڑکانہ جانے والی بس کو حادثہ،3افراد ہلاک

کراچی(اسٹاف رپورٹر)سپر ہائی وے پر کراچی سے لاڑکانہ مسافروں کو لے جانے والی مسافر بس خوفناک حادثے کا شکار ہوگئی جس کے نتیجے میں 3 قیمتی جانیں ضائع اور 8 افراد شدید زخمی ہوگئے۔ تفصیلات کے مطابق سپر ہائی وے جوکھیو موڑ پر دو بسوں میں خطرناک تصادم ہوا جس کے نتیجے میں مسافر بس میں سوار 3 افراد جاں بحق اور8 شدید زخمی ہوگئے۔حادثہ کے بعد پولیس اور ریسکیو اہلکاروں نے موقع پر پہنچ کر لاشوں اور زخمیوں کوفوری طور پر جناح اسپتال منتقل کیا۔حادثہ میں جانبحق ہونے والوں میں ایک بزرگ اور دو کمسن بچے شامل ہیں جن کی فوری طور پر شناخت نہیں ہوسکی۔تاہم زخمیوں میں علی خان،بالاج، عرفان علی،خالد،کم سن بچی رخسانہ ،کم سن بچی بیگم خاتون دختر انور علی ،فریدہ زوجہ انور اور ایک کمسن بچی شامل ہے جس کی شناخت نہیں ہوسکی ہے۔پولیس کے مطابق بس کراچی سے لاڑکانہ جارہی تھی، بس میں 40سے زائد مسافر سوار تھے حادثہ تیز رفتاری کے باعث پیش آیا، بس سلپ ہوکر حادثے کا شکار ہوئی بارش کے باعث روڈ پر پھسلن تھی جو حادثے کا سبب بنی۔