ذوالفقار علی بھٹو کی 45ویں برسی عقیدت و احترام کیساتھ منائی گئی

لاڑکانہ( بیورو رپورٹ) پیپلز پارٹی کے بانی اور سابق وزیراعظم ذوالفقار علی بھٹو کی 45 ویں برسی گڑھی خدا بخش میں عقیدت و احترام کے ساتھ منائی گئی۔ برسی کی تقریب 4 اپریل کو منائی جاتی ہے تاہم رمضان کے احترام میں اسے ملتوی کرکے 14 اپریل تک موخر کیا گیا۔ برسی کے موقع پر ملک بھر سے پیپلز پارٹی کے کارکنوں نے اپنے قائد کو خراج تحسین پیش کیا اور انکے مزار پر فاتحہ خوانی کی اور پھول چڑھائے۔ اس موقع پر مرکزی جلسہ بھی منعقد کیا گیا جس سے صدر آصف زرداری، بلاول بھٹو زرداری، مراد علی شاہ، قائم علی شاہ، نثار کھوڑو اور دیگر نے خطاب کیا۔ برسی کے موقع پر سیکورٹی کے سخت انتظامات کئے گئے تھے اور تقریبا ساڑھے سات ہزار پولیس اہلکاروں کو تعینات کیا گیا تھا جن خواتین، سادہ لباس اور ٹریفک اہلکار بھی شامل تھے۔ گڑھی خدا بخش میں لگ بھگ ایک سو واک تھرو گیٹ اور دو سو سی سی ٹی وی کیمرے بھی نصب کئے گئے تھے۔ تمام کارکنوں کو جامہ تلاشی اور سیکورٹی چیک کے بعد پنڈال میں داخلے کی اجازت تھی۔ کارکنوں کی گاڑیوں کیلئے تین مختلف مقامات پر پارکنگ ایریا مختص کئے گئے تھے۔