آرمی چیف سےسعودی وزیر خارجہ کی ملاقات،دوطرفہ تعاون بڑھانے پر گفتگو

اسلام آباد (نامہ نگار خصوصی) آرمی چیف جنرل سید عاصم منیر سےسعودی عرب کے وزیر خارجہ شہزادہ فیصل بن فرحان السعود نے ملاقات کی، ملاقات میں سعودی وزیر خارجہ کے وفد کے اراکین بھی شامل تھے۔ ملاقات میں باہمی دلچسپی اور مختلف شعبوں میں دوطرفہ تعاون بڑھانے کیلئے پالیسیوں پر بات کی گئی۔ معزز مہمان نے دونوں اقوام کے تعلقات کی تزویراتی نوعیت پر زور دیا۔ آئی ایس پی آر کے مطابق سعودی وزیر خارجہ نے جاری دوطرفہ تعلقات کو مزید مضبوط بنانے کیلئے بہت سے شعبوں میں تعاون کو سراہا جبکہ آرمی چیف نے بھی پاکستان اورسعودی عرب کے مثالی تعلقات کو سراہا۔ ترجمان کے مطابق آرمی چیف نے سعودی وفد کو ہر ممکن تعاون کی یقین دہانی کروائی ، دونوں ملکوں کےعوام میں بھائی چارے کی تعریف بھی کی ۔