بلوچستان کی 14 رکنی کابینہ نے حلف اٹھا لیا، 4مشیر مقرر

20 اپریل ، 2024

کوئٹہ(اسٹاف رپورٹر)بلوچستان کی 14 رکنی کابینہ نے حلف اٹھالیا ، جبکہ وزیراعلیٰ بلوچستان نے 4 مشیر مقرر کردیئے ، تقریب حلف برداری گورنر ہائوس میں ہوئی ، گورنر بلوچستان ملک عبدالولی خان کاکڑ نے وزرا سے حلف لے لیا ۔ تقریب میں وزیراعلیٰ بلوچستان میر سرفراز بگٹی ، رکن قومی میر عثمان بادینی ، ارکان صوبائی اسمبلی میر برکت علی رند ، میر یونس عزیز زہری ، اصغر ترین ، ڈاکٹر ربابہ بلیدی ، زرک خان مندوخیل ، حاجی ولی نورزئی سمیت اعلیٰ سرکاری حکام ، سیاسی و قبائیلی رہنماوں سمیت دیگر نے شرکت کی ۔ حلف اٹھانے والوں میں پاکستان پیپلز پارٹی کے میر محمد صادق عمرانی ، حاجی علی مدد جتک ،سردار سرفراز چاکر ڈومکی، میر ظہور بلیدی ، بخت محمد کاکڑ ، سردار زادہ میر فیصل خان جمالی ،پاکستان مسلم لیگ (ن) کے سردار عبدالرحمٰن کھیتران ، حاجی نور محمد دمڑ ، راحیلہ حمید درانی ، میر سلیم احمد کھوسہ ، میر شعیب نوشیروانی ، میرعاصم کرد گیلو ، بلوچستان عوامی پارٹی کے نوابزادہ طارق مگسی اور میر ضیاء اللہ لانگو شامل ہیں ۔ درایں اثناء جمعہ کو محکمہ ایس اینڈ جی ائے ڈی کیبینٹ سیکشن کے جاری کردہ ایک نوٹیفکیشن کے مطابق پاکستان پیپلز پارٹی کے میر علی حسن زہری ، سردار زادہ غلام رسول عمرانی ، پاکستان مسلم لیگ (ن) کی ڈاکٹر ربابہ خان بلیدی اور نسیم الرحمٰن کو وزیراعلیٰ نے اپنا مشیر کردیا ہے ۔ نوٹیفیکشن کے مطابق صوبائی مشیروں کا درجہ صوبائی وزیر کے برابر ہوگا ۔