بلوچستان میں بہتر طرز حکومت اور شہریوں کو ریلیف پہنچانا ہے، وزیر اعلیٰ

کوئٹہ(اسٹاف رپورٹر)وزیراعلی بلوچستان میر سرفراز بگٹی نے کہا ہے کہ بلوچستان میں بہتر طرز حکومت اور شہریوں کو ریلیف پہنچانا ہماری اولین ترجیحات میں شامل ہے ، دہشت گردی کو ختم کرنے کے لئے موثر اقدامات کرنا ہوں گے ،یہ بات انہوں نے جمعہ کو گورنر ہاوس کوئٹہ میں صوبائی وزراء کی تقریب حلف برداری کے بعد صحافیوں سے بات چیت کرتے ہو ئے کہی ،اس موقع پر صوبائی وزراء حاجی علی مدد جتک ، میر ضیاء اللہ لانگو ، سینیٹر شاہ زیب درانی ، آغا شکیل درانی ، سردار سربلند خان جوگیزئی ، ملک ذیشان ، ندیم آفریدی سمیت دیگر بھی موجود تھے ۔ وزیراعلیٰ بلوچستان میر سرفراز بگٹی نے کہا کہ تمام اتحادی جماعتوں کی مشاورت کے بعد کابینہ کی تشکیل دی ہے جس کی وجہ کابینہ کی تشکیل میں تاخیر ہوئی ،حلف اٹھانے والے تمام وزراء کو جلد قلمدان سونپ دیئے جائیں گے ۔ انہوں نے کہا کہ اس وقت بلوچستان کو دہشت گردی سمیت بہت سے چلینجز کا سامنا ہے ، دہشت گردی کو ختم کرنے کے لئے موثر اقدامات کرنا ہوں گے ۔ انہوں نے کہا کہ حالیہ بارشوں اور سیلابی صورتحال سے نمٹنے کے لئے ٹیمیں مصروف عمل ہیں اگر مدد کی ضرورت پڑی تو وفاق سے بھی رجوع کیا جا ئے گا۔