بھارتی انتخابات میں استعمال ہونیوالی انمٹ سیاہی کا فارمولا سائنسدان ڈاکٹر سلیم الزماں صدیقی نے تیار کیا تھا

کراچی(نیوز ڈیسک)بھارت کی آزادی کے بعد اٹھارہویں عام انتخابات ہو رہے ہیں، جس میں کروڑوں ووٹر اپنا حق رائے دہی استعمال کریں گے۔ووٹ دینے کے بعد انگلی پر نشان لگانے کا آغاز اکتوبر 1951 سے فروری 1952 کے درمیان ہونے والے بھارت کے پہلے عام انتخابات سے ہوا تھا۔ جن کے تجویز کیے گئے فارمولے سے انمٹ سیاہی وجود میں آئی وہ ممتاز سائنسدان ڈاکٹر سلیم الزماں صدیقی تھے جنہوں نے بعد ازاں پاکستان ہجرت کرلی اور یہاں آکر سائنسی تحقیق کے اداروں کی بنیاد رکھی۔سلیم الزماں نے جہاں سائنس کی دنیا میں نام پیدا کیا وہیں ان کے بڑے بھائی چوہدری خلیق الزماں کو قیامِ پاکستان کی تحریک کے مرکزی رہنماؤں میں شمار کیا جاتا ہے۔ 1940 میں سلیم الزماں صدیقی ہندوستان میں قائم ہونے والی کونسل فور سائنٹفک اینڈ انڈسٹریل ریسرچ (سی ایس آئی آر) سے منسلک ہوگئےتھے۔