ہرنائی کوئٹہ شاہراہ چھوٹی بڑی گاڑیوں کے لیے بحال کردی گئی

ہرنائی( نامہ نگار)صوبائی وزیر حاجی نورمحمد خان دمڑ نے ضلعی انتظامیہ ہرنائی کو فوری طور پر قومی شاہراہوں کی بحالی کے لیے ہنگامی بنیادوں پراقدامات اٹھانے کی ہدایت کردی۔ صوبائی وزیر کی ہدایت پر ڈپٹی کمشنر ہرنائی محمد جاوید ڈومکی نے محکمہ بی اینڈار کے افسران اوربھاری مشینری کے ہمراہ ہرنائی کوئٹہ شاہراہ کی بحالی کے لیے زردالوکےمقام پر پہنچ گئےاور ہرنائی کوئٹہ شاہراہ جو گزشتہ سات دنوں سے بارشوں اور ندی نالوں میں سیلابی ریلے آنے کے باعث بند تھی کو مکمل طورپر چھوٹی بڑی گاڑیوں کے لیے بحال کردیا اور ندی نالوں میں پھنسے کوئلہ سے لوڈ ٹرکوں کو زردالوندی سے پار کرالیا۔ صوبائی وزیر حاجی نورمحمد خان دمڑ نے ڈپٹی کمشنر ہرنائی کو ہدایت کی کہ ضلعی ہرنائی کے تمام محکموں کو فعال بناکر عوامی مشکلات حل کرے عوامی مسائل سے غافل کسی بھی آفیسر کو ضلع میں رہنے کی اجازت نہیں دیں گے۔انہوں نے کہاکہ عوام نے اعتماد کرکے بھاری اکثریت سے کامیاب کیاہے عوام کے اعتماد پر پورا اترنے کی ہرممکن کوشش کریں گے۔ صوبائی وزیر حاجی نورمحمد خان دمڑ ڈپٹی کمشنر ہرنائی کو سیلاب متاثرہ حفاظتی بندات کادورہ کرنے اور متاثرہ بندات کی ہنگامی بنیادوں پر تعمیر کرنے اور سیلاب متاثرہ افراد کے نقصانات کاسروے کرکے رپورٹ ارسال کرنے کی بھی ہدایت کی ہے۔