ریکوڈک منصوبے میں سعودی دلچسپی خوش آئند ہے‘ سینیٹر عبدالقادر

اسلام آباد(پ ر)چیئرمین اسٹینڈنگ کمیٹی برائے پیٹرولیم و ریسورسز سینیٹر محمد عبدالقادر نے ایک بیان میں کہا ہے کہ سعودی عرب اربوں ڈالر کے ریکوڈک منصوبے میں حصص خریدنے کےلئے تیار ہے اورممکنہ طورپر وہ ایک ارب ڈالر کی سرمایہ کاری کریگا۔ اس حوالے سے رسمی ڈیل موجودہ مالی سال میں متوقع ہےلیکن یہ اسی وقت ہوگا جب خلیجی تعاون کونسل کے ممالک سے فری ٹریڈ ایگریمنٹ طے پاجائے گا جس میں باہمی سرمایہ کاری کا معاہدہ بھی ہوگا اور غالباً اس موقع پر ولی عہد شہزادہ محمد بن سلمان پاکستان کا دورہ بھی کریں گے۔انہوں نے کہا کہ حکومت پاکستان اور بیرک گولڈ کے بارے میں توقع ہے کہ یہ برابر برابر لیکن اقلیتی حصص سعودی عرب کے بڑے گروپ کو بیچیں گے اور یہ حصص 10 سے 30 فیصد کے درمیان ہوں گے۔ یہ توقع کی جارہی ہے کہ دونوں فریقین سعودی عرب کو برابر برابر شیئر فروخت کریں گے تاکہ ریکوڈک کے پراجیکٹ میں حکومت پاکستان اور بیرک گولڈ دونوں کے حصص کی تعداد برابر رہے۔