ضمنی الیکشن میں دھاندلی ہوئی تو ذمہ دار وفاقی و صوبائی حکومتیں ہونگی ،بی این پی

کوئٹہ(پ ر)بلوچستان نیشنل پارٹی کے مرکزی سیکرٹری اطلاعات آغا حسن بلوچ نے کہا ہے کہ ڈپٹی کمشنر خضدار ضمنی انتخابات سے قبل ہی دھاندلی کیلئے راہ ہموار کر رہے ہیں جو کسی صورت کامیاب نہیں ہوگی ریٹرننگ آفیسر ہونے کے ناطے انہیں غیر جانبدار کردار ادا کرنا چاہئے وڈھ کی مخدوش صورتحال سے آج تک تمام تر سازشوں میں موصوف برابر کے شریک ہیں چیف الیکشن کمشنر کو حالات سے آگاہ کر دیا گیا ہے چیف جسٹس بلوچستان ہائی کورٹ اور صوبائی الیکشن کمشنر پولنگ اسکیم کو شفاف بناتے ہوئے جانبدار ریٹرننگ آفیسر کی تبدیلی کو یقینی بنائیں بی این پی اور جمعیت کے آج کے عظیم الشان جلسہ نے انتخابات سے قبل ہی نتیجہ بی این پی کے امیدوار کے حق میں دیدیا ہے ضمنی انتخابات میں دھاندلی کی گئی تو تمام تر حالات کے خرابی کی ذمہ داری مرکزی و صوبائی حکومتوں اور جانبدار ڈپٹی کمشنر پر عائد ہوگی انہوں نے کہا کہ آج ملک اور صوبے کی قد آور سیاسی شخصیت بی این پی کے سربراہ ڈپٹی کمشنر آفس کے سامنے دھرنے پر بیٹھے ہیں مگر حکمران ٹس سے مس نہیں ہو رہے جو قابل افسوس ہے۔21اپریل کے ضمنی انتخابات میں پی بی 20پر 8فروری کی تاریخ کو دہرانے اور ایک ایسے شخص کو کامیاب کرانے کی کوشش کی جا رہی ہے جس کے کردار و عمل سے ملک و بلوچستان کا ہر ذی شعور بخوبی واقف ہے۔