بی ایم سی میں کرپشن کی ہوشربا کہانیاں، قیمتی سامان غائب

کوئٹہ ( نسیم حمید یوسف زئی /اسٹاف رپورٹر)بولان میڈیکل کمپلیکس ہسپتال میں کرپشن اور بدعنوانی کی تحقیقات میں مزید اہم انکشافات سامنے آئے ہیں ۔ اینٹی کرپشن نے تحقیقات کا دائرہ وسیع کرتے ہوئے شیخ زید ٗ سول ہسپتال اور ٹراما سنٹرز میں مشینری کا ریکارڈ طلب کر لیا۔ دوسری جانب بی ایم سی ہسپتال کریشن میں ملوث افراد نے بچائو کیلئے بااثر شخصیات سے رابطے شروع کر دئیے ،ذرائع کے مطابق وزیر اعلیٰ میر سرفراز بگٹی کی ہدایت پر اینٹی کرپشن نے سی ٹی اسکین مشین اور کورونا میں فراہم کئے جانے والے درجنوں وینٹی لیٹرز کے قیمتی پرزے غائب کر دئیے گئے جبکہ کروڑوں روپے مالیت کی زائد المیعاد ادویات اسٹورز اور گودام میں موجودہونے کی تحقیقات کا آغاز کیا ہے بولان میڈیکل کمپلیکس ہسپتال میں کرپشن اور بدعنوانی کی ابتدائی تحقیقات میں اہم انکشافات سامنے آنے بعد اعلیٰ حکام کی منظوری پر اینٹی کرپشن ٹیم نے تحقیقات کا دائرہ کار وسیع کرتے ہوئے شیخ زید ہسپتال ٗ سول ہسپتال اور ٹراما سنٹر مشینری کے حوالےسے بھی ریکارڈ طلب کر لیا ہے ذرائع نے بتایا کہ مشینری کے پرزہ جات کی چوری میں اہم شخصیات اور ہسپتال میں موجود مافیا کے ملوث ہونے کے بھی شواہد ملے ہیں جنہوں نے پرائیویٹ ہسپتالوں کے مالک کی ملی بھگت سے سرکاری ہسپتالوں کی مشینریز کے پرزہ جات غائب کئے جس سے پرائیویٹ ہسپتالوں کو فائدہ پہنچا۔