21اپریل کو الیکشن نہیں ریفرنڈم ہونے جا رہا ہے، زین قریشی

راولپنڈی (جنگ نیوز)پاکستان تحریکِ انصاف کے رہنما شاہ محمود قریشی کے صاحبزادے زین قریشی نے کہا ہے کہ21تاریخ کو الیکشن نہیں ریفرنڈم ہونے جا رہا ہے۔لاہور کی انسدادِ دہشت گردی عدالت کے باہر میڈیا سے گفتگو کرتے ہوئے انہوں نے کہا کہ جیسے 8 فروری کو عوام نے ووٹ دیا ایسے ہی21اپریل کو ووٹ دینا ہوگا۔زین قریشی کا کہنا ہے کہ عوام نے 8 فروری کو ہمیں ووٹ دیا اور ہمارا ووٹ چوری کیا گیا، فارم 45 اور فارم 47 کو تبدیل کیا گیا، میری عوام سے گزارش ہے کہ ہم نے اپنا ووٹ کاسٹ بھی کرنا ہے اور ووٹ کی حفاظت بھی کرنی ہے۔انہوں نے کہا کہ 21 اپریل کو آنے والا رزلٹ بانی پی ٹی آئی اور شاہ محمودقریشی کی رہائی کا آرڈر ہو گا، جس طرح سے ہم نے مہم دیکھی اس حوالے سے پاکستان کی مقبول ترین جماعت پی ٹی آئی ہے۔انہوں نے کہا کہ میں اڈیالہ جیل گیا تو بانی پی ٹی آئی نے پیغام دیا کہ 21 تاریخ کو نکلیں اور پی ٹی آئی کو جتوائیں، 21 کو ہم نے ووٹ اور جمہوریت کے ذریعہ بدلہ لینا ہے، میاں نواز شریف کا مستقبل اس ملک میں نہیں دیکھ رہے۔