غیر متوقع بارشوں کا سلسلہ ماحولیاتی تبدیلی کے اثرات کی علامت ہے، شیری رحمٰن

اسلام ا ٓباد ( آن لائن ) پیپلز پارٹی کی پارلیمانی لیڈر سینیٹر شیری رحمٰن نے طوفانی بارشوں کے باعث ہلاکتوں اور نقصانات پر تشویش اور افسوس کا اظہار کیا ہے ۔اپنے ایک بیان میں شیری رحمٰن کا کہنا تھا کہ ملک بھر میں حالیہ طوفانی بارشوں کے باعث81افراد جاں بحق ہونے پر دلی صدمہ ہوا ہے، بارشوں کی وجہ سے200سے زائد مکانات کو بھی نقصان ہوا ہے،بارشوں میں بلوچستان، خیبر پختون خواہ اور آزاد کشمیر میں قیمتی انسانی زندگیوں کے ضائع ہونا ہم سب کیلئے ایک خطرے کی گھنٹی ہے، ان کا کہنا تھا کہ مون سون سے پہلے اس طرح کی بارشیں باعث تشویش ہیں، 29 اپریل تک بارشیں متوقع ہیں جس کے باعث این ڈی ایم اے نے سیلاب کا خدشہ ظاہر کیا ہے، غیر متوقع اور غیر معمولی طوفانی بارشوں کا سلسلہ ماحولیاتی تبدیلی کے اثرات کی علامت ہے، ہمیں پہلے سے زیادہ محتاط اور چوکنا رہنے کی ضرورت ہے، انتظامی اداروں کو 2022 جیسی بڑی تباہی سے بچنے کیلئے پیشگی اور ہنگامی اقدامات لینے ہونے، شیری رحمان نے کہا کہ مجھے امید ہے کہ ہم 2022 کے سیلاب سے بہت کچھ سیکھ چکے ہیں اور ہم تاریخ کو نہیں دہرائیں گے۔