پاکستانی فوج بہترین نظم و ضبط کی حامل ، جنگی صلاحیتوں میں ماہر ہے، برطانوی آرمی چیف

لندن ( آن لائن ) برطانوی آرمی چیف جنرل پیٹرک سینڈرز نے پاکستان کی مسلح افواج کو دنیا کی بہترین نظم وضبط کی حامل فوج قرار دیتے ہوئے خراج تحسین پیش کیا ہے اور کہا ہے کہ پاکستان کی فوج جنگی صلاحیتوں میں ماہر ہے ،پاک فوج کی پیشہ وارانہ مہارت کا کوئی موازنہ نہیں، یہ ملک کے دفاع کی صلاحیت کے ساتھ ساتھ شراکت دار ممالک کو مدد فراہم کرنے کی وجہ سے بھی جانی جاتی ہے ۔ تفصیلات کے مطابق کمانڈاینڈسٹاف کالج کوئٹہ سے فارغ التحصیل برطانوی فوجی افسران کی لندن میں تقریب ہوئی جس میں پاکستانیوں کی مہمان نوازی کو بے مثال قرار دیااور پاک فوج کی پیشہ ورانہ مہارت اور استعداد کو سراہتے ہوئے اسے دنیا کی بہترین نظم و ضبط کی حامل فوج قرار دیا گیا۔کوئٹہ ایسوسی ایشن کے 50 سینئر برطانوی فوجی جوان جنہوں نے گزشتہ 50 سالوں میں پاکستان آرمی کے ایلیٹ کمانڈ اینڈ سٹاف کالج میں تعلیم حاصل کی نے بھی تقریب میں شرکت کی۔اس موقع پر برطانیہ کے آرمی چیف جنرل پیٹرک سینڈرز نے بطور مہمان خصوصی شرکت کی۔تقریب میں لیفٹیننٹ جنرل الیسٹار ارون، لیفٹیننٹ جنرل انتھونی پالمر، بریگیڈیئر نک تھامسن، بریگیڈیئر ٹونی بیری اور میجر جنرل کیماس شامل نے شرکت کی ،تقریب کا انعقاد پاکستان ہائی کمیشن لندن میں آرمی اور ایئر ایڈوائزر نے کیا۔جنرل پیٹرک نے اپنے دور میں ڈیفنس ایسوسی ایشن اور دفاعی تعاون کے مختلف پہلوؤں میں پاکستان کو برطانوی فوج کی اولین ترجیح قرار دیا اور پاکستا نی آرمی چیف جنرل عاصم منیر کی قیادت کی تعریف کی ،جنرل پیٹرک نے پاکستان کے دفاعی ونگز اور برطانوی ہائی کمیشن کی جانب سے دیرینہ تعلقات کو ایک اور سطح پر لے جانے کے لیے ملٹری ڈپلومیسی کی پرجوش کوششوں کو بھی سراہا۔