شیر افضل کا بیان، پی ٹی آئی وفد سعودی سفیر کو پارٹی موقف کی وضاحت کی کوشش کریگا

اسلام آباد (صالح ظافر) پاکستان تحریک انصاف (پی ٹی آئی) کا ایک وفد پاکستان میں سعودی عرب کے سفیر نواف بن سعید المالکی سے ملاقات کر کے پارٹی کے سینئر رہنما اور رکن قومی اسمبلی شیر افضل خان مروت کے بیان کے حوالے سے پارٹی کا موقف واضح کرنے کی کوشش کرے گا جنہوں نے مبینہ طور پر امریکہ کے علاوہ سعودی عرب کو 2022 میں پی ٹی آئی کی حکومت گرانے میں کردار ادا کرنے کا ذمہ دار ٹھہرایا تھا۔ سفارتی ذرائع نے دی نیوز کو بتایا کہ سفارتی برادری پی ٹی آئی رہنما کے کچھ غیر ذمہ دارانہ بیانات سے بیزار ہے جو اپنی چھوٹی موٹی سیاست کے لیے بغیر کسی بنیاد کے بیرونی ممالک کو ملوث کرنے کی کوششیں جاری رکھے ہوئے ہیں۔ پی ٹی آئی کے ترجمان رؤف حسن نے ایک ٹی وی ٹاک شو میں اعلان کیا کہ پی ٹی آئی کا وفد سعودی سفیر کو اپنا موقف بیان کرے گا اور اس مقصد کے لیے وہ سفیر نواف سے ملاقات کی درخواست کرے گا۔ دریں اثناء سفیر نواف بن سعید المالکی آئندہ ہفتے وزیر اعظم شہباز شریف کے دورہ ریاض سے قبل شاہی انتظامیہ سے اہم مشاورت کے لیے جلد ہی ریاض کا دورہ کرنے والے ہیں۔