چیف جسٹس کے نام عمران خان کا خط

اسلام آباد(نمائندہ جنگ)پاکستان تحریک انصاف کے سیکرٹری اطلاعات رئوف حسن نے مطالبہ ہے کہ چیف جسٹس قاضی فائز عیسیٰ آئین پر صحیح طریقہ سے عمل درآمد کروائیں ، نہ تو چیف جسٹس نے خود انصاف کیا اور نہ ماتحت عدالتوں سے انصاف دلایاہے،اس حوالے سے پارٹی کے بانی چیئرمین ،عمران خان کی جانب سے بھی چیف جسٹس کے نام ایک خط لکھ کر تحریک انصاف کے کارکنوں پر ریاستی ظلم کی نشاندہی اور انصاف کی فراہمی کا مطالبہ کیا ہے، 4 صفحات پر مشتمل خط بھی میڈیا کو جاری کردیاگیا ،پی ٹی آئی کے مرکزی سیکرٹری اطلاعات رئوف حسن نے ہفتہ کے روز پریس کانفرنس کرتے ہوئے کہا ہے کہ جوظلم بھی ہمارے ساتھیوں پر ہورہا ہے اس کی ذمہ داری چیف جسٹس پر عائد ہوتی ہے، پچھلے بہت دنوں سے ضمنی انتخابات کے اعلان کے بعد ہمارے کارکنوں کے گھروں پر چھاپے مارے جا رہے ہیں اور ان کے خاندان کے لوگوں کے ساتھ بد سلوکی معمول بن گیا ہے۔