پی ٹی آئی کا امریکی پابندیوں سے متعلق حقائق سامنے لانے کا مطالبہ

اسلام آباد(جنگ رپورٹر)پاکستان تحریک انصاف نے وفاقی حکومت سے پاکستان کے میزائل پروگرام کیلئے سامان و آلات فراہم کرنے والی کمپنیوں کے خلاف امریکی حکومت کی جانب سے پابندیوں کے نفاذ سے متعلق معاملہ پر فی الفور حقائق قوم کے سامنے لانے کا مطالبہ کردیاہے ،پی ٹی آئی کی پریس ریلیز کے مطابق پاکستان کے میزائل پروگرام سے وابستہ کمپنیوں کے حوالے سے امریکی انتظامیہ کے اقدام کی خبر ہر لحاظ سے حساس اور باعثِ تشویش ہے، امریکی انتظامیہ کے اقدام نے میزائل پروگرام کے حوالے سے پوری قوم میں تشویش کی ایک غیر معمولی لہر کو جنم دیا ہے،عوامی تائید و مینڈیٹ سے محروم حکومت کی نہایت حساسیت کے حامل دفاع اور خارجہ امور سے جڑے معاملات سے نمٹنے کی صلاحیت پر آنکھیں بند کرکے اعتماد کرنا ممکن نہیں ہے ،امریکی انتظامیہ کے اس اقدام پر وفاقی حکومت خصوصاً وزارتِ دفاع کا موقف کیا ہے ؟اور اس پر کیا حکمت عملی اختیار کرنے کا ارادہ رکھتے ہیں؟